HVAÐ GERÐU ÞEIR ÞÉR, ÍSLAND???

    

 

  

Er reiðarslagið dundi yfir ráðvillt Ísaland

 

og risarnir í útrásinni sigldu öllu í strand

 

Svo vanmáttug ég sat og vissi ekkert í minn haus

 

veröld virtist hrunin,ég var alveg varnarlaus.

  

 

Þó ekki væru peningar að plaga lífið mitt

 

persónuleg mál í höfn og ég og bankinn kvitt

 

Þá leið mér eins og látist hefði ástvinur mjög kær

 

líðanin var hræðileg, ég tók mér þetta nær.

  

Að skilja þessar upphæðir sem nefndar voru þá

 

er þraut sem mér var engan veginn mögulegt að ná

 

Milljarðar og billjarðar sem enginn gat gert skil

 

upphæðir í peningum sem aldrei voru til.

  

Þó fannst mér svikin verri, að ég tali ekki um

 

skítlegheitin sem að viðhöfð voru í bönkunum

 

Óþverrinn og óheilindin falinn allmörg ár

 

ótrúlegt að enginn hafi stöðvað þetta fár.

  

Almúginn sem hafði ei um skítinn grænan grun

 

stendur eftir slipp og snauður eftir þetta hrun

 

Heimilin á heljarþröm, af krónu engin not

 

Óöryggið endalaust og allt á leið í þrot.

  

Atvinnan svo tvísýn öll og framtíð dimm og grá

 

enginn veit hve ástand þetta lengi vara má

 

svo vont og sárt mér finnst að sjá hvar skaðinn mestur er

    stoltið helsært, staðan slík að illa hjartað sker.     

 

Ráðamenn svo rænulausir sannfærðu ei neinn 

svikin voru opinber og hvergi skjöldur hreinn

 

enga miskunn sýndu landsmenn þessum hnípna her

 

mótmæltu uns stjórnin neyddist til að segja af sér.

  

Í stjórnleysi og glundroða við flutum stefnulaus

 

fólkið krafðist réttlætis og þoldi ekkert raus

 

búsáhaldabyltingin hún skilað hefur því

 

að landið okkar endurheimtir kannski traust á ný.

  

Hvað verður um þig landið mitt er óljóst enn um sinn

 

ég held þó að með tímanum þá hýrni klakinn minn

 

Hið Nýja Ísland verður byggt á heiðarlegan hátt

 

hérna munu Íslendingar heilir lifa í sátt.

                                                                                        Bergljót Hreinsdóttir 2009.

 

 

Athugasemdir

[Sigrún Jónsdóttir, 4.2.2009 kl. 18:23]

Vá!  Meiriháttar ljóð.  Takk fyrir.

Veit ekki af hverju....en mér var hugsað til Einars Ben á meðan ég las

[Bergljót Hreinsdóttir, 4.2.2009 kl. 18:50]

Takk fyrir það Sigrún mín..vááá.....Einar Ben kallinn já...jahérna hér.....

Ég er hins vegar enn að berjast við þetta kerfi hérna...erindin leka öll saman í eitt....

[Ragnhildur Jónsdóttir, 4.2.2009 kl. 22:35]

Alveg frábært ljóð! segir allt um þetta ótrúlega tímabil á svona ljóðrænan ljúfan hátt, svona líka "lítið ljóðrænt ástand" eða þannig.

Takk, frábært

[Steingrímur Helgason, 4.2.2009 kl. 23:29]

Auganz konfect að leza hér.

[Anna Margrét Bragadóttir, 4.2.2009 kl. 23:36]

Vá þetta ljóð segir allt um það, hvað við sem þjóð erum að upplifa.

Takk fyrir þetta þú ert snillingur

Knús og meira knús

[diljá (IP-tala skráð) 5.2.2009 kl. 21:47]

morgunblaðið, senda ?

[Hrönn Sigurðardóttir, 6.2.2009 kl. 13:54]

Til hamingju með daginn í dag